ပင်လယ်ရေမျက်နှာပြင်အထက် ပေ ၈,၀၀၀ ကျော်မှာ တည်ရှိတဲ့ တီးတိန်မြို့လေးက ချင်းပြည်နယ်ရဲ့
ကောင်းကင်မြို့တော်လို့ တင်စားခေါ်ရ မလိုပါဘဲ။
တီးတိန်မြို့ကို ကလေးမြို့ကတစ်ဆင့် သွားရောက်လည်ပတ်နိုင်ပါတယ်။ကလေး - တီးတိန် ပြေးဆွဲနေတဲ့ ခရီးသည် ၁၂ ယောက် ဆံ့ မှန်လုံကားငယ်လေးတွေက တနင်္ဂနွေတစ်ရက်ကလွဲပြီး တစ်ပတ် ခြောက်ရက် အတက်အဆင်း ရှိပါတယ်။တစ်ဦးကို ကျပ် ၈,၀၀၀ သာပေးရတဲ့ မှန်လုံကားငယ်လေးတွေ ကို ဒေသခံတွေနဲ့ အတူစီးရင်း ကလေး - တီးတိန် တောင်တက်လမ်း အတွေ့အကြုံကို မျှဝေခံစားနိုင်ပါတယ်။
အများနဲ့ မသွားချင်ဘဲ တောင်တက်လမ်းတစ်လျှောက် ဓာတ်ပုံရိုက်ရင်း အေးအေးဆေးဆေး
သွားချင်တယ်ဆိုရင် စင်းလုံးငှား ကားတွေလည်း ရှိပါတယ်။ကိုယ်သွားလိုတဲ့ ခရီးအကွာအဝေး၊ ကြာမယ့်ရက်ပေါ် မူတည်ပြီး အနည်းဆုံး ကျပ်တစ်သိန်းခွဲကနေငါးသိန်း ကျော်အထိ ရှိပါတယ်။
တီးတိန် အသွားလမ်းကတော့ ကလေးမြို့ အထွက် လမ်းမပေါ်ရောက်တာနဲ့ နေရာတိုင်းက
စိတ်ဝင်စားဖို့ကောင်းပြီး မြင်မြင်သမျှ အရာအားလုံးက လှပနေပါတယ်။
တဖြည်းဖြည်း တောင်ပေါ်ရောက်လာတာနဲ့ ကလေးမြို့လေးက အနောက်မှာ ကျန်ခဲ့ပြီး ပတ်ဝန်းကျင်မှာ
လှပတဲ့ တိမ်တွေ၊ တောင်နံရံတွေက နေရာယူလာပါတယ်။
လမ်းတစ်လျှောက်လုံး တောင်အကွေ့အ၀ိုက်တွေနဲ့ ချောက်ချားစရာ ချောက်ကမ်းပါးတွေကိုလည်း
မကြာခဏ ဆိုသလို ဖြတ်ကျော်ရပါတယ်။
ရာသီဥတုသာယာပြီး မြေပြိုတာမျိုး၊ ကားလမ်းပိတ်တာမျိုးမရှိရင် တီးတိန်ကို အချိန် လေးနာရီအတွင်း
ရောက်နိုင်ပါတယ်။ရာသီဥတုနဲ့ ကားလမ်းအခြေအနေက အရမ်းဆိုးတယ်ဆိုရင် လမ်းပြန်ရှင်းတဲ့အထိ စောင့်ရဖို့ တစ်ရက်၊ နှစ်ရက်လည်း ကြာတတ်ပါတယ်။
ဒါကြောင့် တီးတိန်တောင်တက်လမ်းက ရာသီဥတုနဲ့ အဓိက သက်ဆိုင်ပါတယ်။
တောင်တက်ကား စီးနေရင်း ရှေ့မှာ ကြိုမမြင်နိုင်တဲ့ လမ်းခရီးအခြေအနေကြောင့် ဘာဖြစ်နိုင်မလဲ
တွေးနေရလို့ တောင်တက်ခရီးကရင်ခုန်လှုပ်ရှားဖို့ ကောင်းပါတယ်။တိမ်တွေကိုငေးလိုက်၊ ချောက်ကမ်းပါးနားရောက်ရင် ရင်ခုန်လိုက်နဲ့ တကယ့်ကို စွန့်စားခန်းရောက်နေသလိုပါပဲ။
စွန့်စွန့်စားစားခရီးသွားရတာ ၀ါသနာပါတဲ့သူဆိုရင် တီးတိန်က ခရီးထွက်ဖို့ အကောင်းဆုံးနေရာ တစ်ခုပါပဲ။
သွားနေတဲ့ ကားလေးက တောင်ပေါ်အမြင့် ရောက်လေ ရာသီဥတုကလည်း တဖြည်းဖြည်း
ပိုလေးလာပြီး တိမ်တွေကလည်း ပိုလှလာပါတယ်။တီးတိန်ရောက်ခါနီး တစ်နာရီခွဲအလို အားလွီရွာလို့ခေါ်တဲ့ တောင်ပေါ်ရွာလေးမှာ ရေမရောတဲ့ သဘာဝ နွားနို့စစ်စစ်ရပါတယ်။
နွားနောက်နဲ့ ရိုးရိုးနွားစပ်ပြီး သားဖောက်ထားတဲ့ နွားကရရှိတဲ့ နွားနို့ကို မီးဖိုပေါ်ကနေ ပူပူနွေးနွေးနဲ့
ထည့်ပေးတာမို့ အေးချမ်းတဲ့ ရာသီဥတုနဲ့ ကိုက်ညီလှပါတယ်။
တီးတိန်တောင်ပေါ်မြို့လေးက တခြား နယ်မြို့လေးတွေလောက် ဖွံ့ဖြိုးတိုးတက်မှု မရှိသေးပေမဲ့
တကယ့်ကို အေးချမ်းတဲ့ မြို့လေးဖြစ်ပါတယ်။တီးတိန်ရောက်ပြီဆိုတာနဲ့ ရာသီဥတုကလည်း ကလေးနဲ့ တခြားဆီဖြစ်သွားပြီး အနွေးထည် မထူမပါးဝတ်ထားရပါပြီ။
သဘာဝအလှတရားတွေ၊ လေ့လာစရာရိုးရာယဉ်ကျေးမှုတွေနဲ့ ပြည့်နှက်နေတဲ့ တီးတိန်မြို့လေးကို
ရောက်ဖို့ဆိုရင် ကြမ်းတမ်းခက်ခဲတဲ့ တောင်တက်လမ်းကို အရင်ဖြတ်ကျော်ရပါတယ်။
တောင်ပေါ် ရောက်ပြီဆိုတာနဲ့ ပင်ပန်းခဲ့သမျှ အရာအားလုံး မေ့ပြီး ပြန်တွေးမိတိုင်း ဘယ်တော့မှ
နောင်တမရတဲ့ ခရီးစဉ်အဖြစ်နဲ့ ဘ၀တစ်လျှောက်လုံး အမှတ်ရနေမှာဖြစ်ပါတယ်။
Myanmar Times
No comments:
Post a Comment